Sajak Bambang Supena
(Panyajak & Guru)
ladang ngotrét jeung lamunan
ti enol nepi salapan
tetep matak panasaran
miharep untung lipetan
ngarumus sagala jurus
ti puluh nepi ngaratus
néangan angka nu mulus
sugih beunghar sugan tulus
dua welas jumlah shio
dipasieup ngaran sato
aya beurit aya belo
kelenci maung jeung kebo
ieu sajak, sajak togél
nyepeng keretas jeung ponsél
bagadang nepi ka belél
boa rejeki katoél
judi darat judi onlén
pangaboga kabéh pérén
ngimpi panén ngomé pulpén
balangsak jadi papastén
2020
