Sajak Déni A. Fajar
(Panyajak & Wartawan HU Tribun Jabar)
matapoé beulah luhureun sirah
léngkah kebat ka pakalangan
teuing nuturkeun saha atawa dijurung saha
aya nu ngajak padungdung: lagu hirup!
jelema ngagimbung di pakalangan
mana jago mana nu lalajo:
awor dina héabna hawa napsu!
nu lalajo éak-éakan nu tarung bébéakan
éléh meunang éta rusiah. dina tungtung labirin waktu
matapoé beulah luhureun sirah!
Sumber:
Lagu Padungdung: Antologi Puisi Déni A. Fajar (2012)
Wedalan Syabas Books, Bandung
