Sajak Zulaikha Sasmita
Panyajak & Guru
Sandékala ngibingan gelik tarawangsa
Aya haleuang nu hawar-hawar nawarkeun trésna
Dialokan bebencé anu hayang meupeuskeun simpé
Ngiwat lelembutan anu keur marojéngja haté
Wirahma tandak mawa duruwiksa milu ngepyak
Ngareundeuk marengan eur-eur
Ramo-ramo nu marecut nyeluk pinuh pangirut
Geura saba janturan keur nyantélkeun rasa nu pagaliwota
Bulan ukur humandeuar
Nyébakeun harepan dina kikiding peuting
Mongkléng peteng nyamunikeun katineung
Ngoléabkeun angen-angen dina kulambu méga nu ngayang-ngayang
Geura papag abringan béntang
Suligar kakemba nu baranang ngawasa awang-awang
Aya haréwos angin malipir simpé
Asihna bulan moal sulaya geusan sampeureun jaga
